Cunghgoz Gungcanjdangj Gaiq Ngeihcib Cunghyangh Veijyenzvei Baez Hoih Daengxcungq Daihsam youq 2024 nienz 7 nyied 15 hauh daengz 18 hauh youq Baekging hai.

Gij veijyenz daeuj camgya baez cienzhoih neix miz, cunghyangh veijyenz 199 boux, boux cunghyangh veijyenz deqbouj 165 boux. Doengh boux veijyenz aen cangzvu veijyenzvei Cunghyangh Gijliz Genjcaz Veijyenzvei caeuq gij bouxdaeuz mizgven fuengmienh lezsiz baez hoih neix. Mbangj gihcwngz dungzci caeuq conhgyah yozcej ndaw daibyauj Ngeihcib Daih aen Dangj caemh lezsiz baez hoih neix.

Cienzhoih youz Cunghyangh Cwngcigiz guhdaeuz hai. Boux cungjsuhgi Cunghyangh Veijyenzvei Siz Ginbingz guh le gangjvah youqgaenj.

Cienzhoih dingqaeu caeuq yaenglwnh le aen baugau hongsaeh youz Cunghyangh Cwngcigiz dak Siz Ginbingz guh haenx, saemjlwnh doenggvaq le 《Aen Gietdingh Cunghgung Cunghyangh Gvendaengz Caiq Cienzmienh Gyalaeg Gaijgwz、Doihaeuj Gij Yendaiva Yiengh Cungguek》. Siz Ginbingz doiq 《Gietdingh （Faenh Gauj Yaenglwnh）》 youq gwnz hoih guh le gangjmingz.

Cienzhoih cibfaen haengjdingh gij hongsaeh Cunghyangh Cwngcigiz daj Baez Ngeih Cungh Cienzhoih Gaiq Ngeihcib aen Dangj doxdaeuj guh haenx. Doengzcaez nyinhnaeuz, najdoiq aen vanzging rog guek yiemzhaenq fukcab caeuq gij yinvu gaijgwz hwngfat onjdingh ndaw guek gannanz naekgywg, Cunghyangh Cwngcigiz nyinhcaen doeksaed gij cingsaenz Ngeihcib Daih caeuq Baez It Cungh、Baez Ngeih Cungh Cienzhoih Gaiq Ngeihcib aen Dangj, youh caez youh cinj cienzmienh doekguh yiengh leixniemh hwngfat moq, dawzmaenh aen diuhgoek guhhong youq ndaw onjmaenh gouz baenaj, daengxbuenz suenqveh doihaeuj aen cungjdaej baijbouh “haj yiengh gap baenz aen”、dox boiqhab bae doihaeuj aen canloz baijbouh “seiq aen cienzmienh”, daengxbuenz suenqveh ndaw guek rog guek song aen daihbuenz, daengxbuenz suenqveh hwngfat caeuq ancienz, roengzrengz doinyoengx yiengh hwngfat caetliengh sang, caiq doinyoengx caeuq maeuzveh cienzmienh gyalaeg gaijgwz, netsaed doihaeuj hwnqguh yiengh minzcuj fapceih sevei cujyi, mboujduenh gyarengz guh gij hongsaeh senhconz swhsiengj vwnzva, saedcaih ca ndei gij hongsaeh baujcang gwndaenj beksingq caeuq baujhoh swnghdai vanzging, laemxsim henhoh guekgya ancienz caeuq ndawbiengz onjdingh, mizrengz doihaeuj guh’ak gozfangz caeuq bingdoih, laebdaeb doihaeuj gij hongsaeh Yanghgangj Aumwnz caeuq gij hongsaeh nangqdaengz Daizvanh, haeujlaeg doihaeuj yiengh vaigyauh guekhung miz gij daegsaek Cungguek, daengzdaej doihaeuj cienzmienh yiemzhaenq guenj Dangj, guhbaenz ginghci ndaej dauqhwng coh ndei, cienzmienh hwnqguh aen guekgya sevei cujyi yendaiva byaij ok yamqdin maenhsaed.

Cienzhoih gig sang bingzgyaq le gij hongsaeh gaenq baenz caeuq yiengh cingzcik hungmbwk seizdaih moq doxdaeuj cienzmienh gyalaeg gaijgwz aeundaej, munaemj le gij vwndiz caiq cienzmienh gyalaeg gaijgwz、doihaeuj gij yendaiva yiengh Cungguek, nyinhnaeuz seizneix caeuq baezlaeng mboengq ndeu, dwg mboengq ceiq youqgaenj aeu yendaiva yiengh Cungguek bae cienzmienh doihaeuj gij saehnieb hungmbwk hwnqguh guekak、fukhwng minzcuz. Gij yendaiva yiengh Cungguek, dwg youq ndaw gaijgwz hailangh mboujduenh guh doxbae, ngoenzlaeng hix itdingh youq ndaw gaijgwz hailangh hai ok roennaj gvangqlangh. Najdoiq gij hingzseiq lai yiengh labluenh ndaw guek rog guek, najdoiq lwnz moq gohgi gwzming caeuq canjnieb bengwz, najdoiq gij maqmuengh moq yinzminz ginzcung, itdingh aeu gagrox baij gaijgwz youq giz engq youqgaenj, gaenjmaenh hopheux gaiq hong doihaeuj gij yendaiva yiengh Cungguek caiq bae cienzmienh gyalaeg gaijgwz.

Cienzhoih daegbied gangj daengz, caiq cienzmienh gyalaeg gaijgwz, itdingh aeu dawzmaenh Majgwzswh Lezningz Cujyi、Mauz Cwzdungh Swhsiengj、Dwng Siujbingz Lijlun、“Sam Aen Daibyauj” Cungyau Swhsiengj、Gohyoz Fazcanjgvanh, cienzmienh dawzdingh Aen Swhsiengj Sevei Cujyi Miz Gij Daegsaek Cungguek Seizdaih Moq Siz Ginbingz, haeujlaeg hagsib dawzdingh baenzroix swhsiengj moq、gvanhdenj moq、lwnhduenh moq Siz Ginbingz cungjsuhgi gangj cienzmienh gyalaeg gaijgwz, youh caez youh cinj cienzmienh doekguh yiengh leixniemh hwngfat moq, dawzmaenh aen diuhgoek guhhong youq ndaw onjmaenh gouz baenaj, seizseiz gaijfang swhsiengj、ciuq saedsaeh guh、riengz seiz baenaj、gouz caen guh saed, caiq bae langhcuengq caeuq guhhoengh gij swnghcanjliz ndawbiengz、gikfat caeuq dem’ak gij rengzhoengh ndawbiengz, daengxbuenz suenqveh ndaw guek rog guek song aen daihbuenz, daengxbuenz suenqveh doihaeuj aen cungjdaej baijbouh “haj yiengh gap baenz aen”, dox boiqhab bae doihaeuj aen canloz baijbouh “seiq aen cienzmienh”, aeu ginghci dijci gaijgwz daeuj yienyinx, aeu coihaeuj ndawbiengz goengbingz cingqngeih、gyalai fukheiq hawj yinzminz guh giz hwnjdin caeuq giz roengzdin, engqgya yawjnaek hidungj comzbaenz, engqgya yawjnaek lai haeujrengz giz youqgaenj, engqgya yawjnaek gaijgwz raen ndei raen baenz, doinyoengx swnghcanj gvanhhi caeuq swnghcanjliz、sangcwngz gencuz caeuq ginghci giekdaej、guekgya ceihleix caeuq aenbiengz hwngfat engq ndei doxhab doxngamj, aeu rengz hung caeuq aeu cidu bauj guh ndei gaiq hong yendaiva yiengh Cungguek.

Cienzhoih ceijok, aen cungjmoegbiu caiq cienzmienh gyalaeg gaijgwz dwg laebdaeb caezcienz caeuq hwngfat aen cidu sevei cujyi miz gij daegsaek Cungguek, doihaeuj aen dijhi ceihleix caeuq gij naengzlig ceihleix guekgya hab yienhdaih aeuyungh. Daengz 2035 nienz, cienzmienh guhbaenz aen dijci yiengh hawciengz ginghci sevei cujyi suijbingz sang, aen cidu sevei cujyi miz gij daegsaek Cungguek engqgya caezcienz, daihdaej guhbaenz aen dijhi ceihleix caeuq gij naengzlig ceihleix guekgya hab yienhdaih aeuyungh, daihdaej guhbaenz sevei cujyi yendaiva, vih daengz duenhgyang aen sigij neix ndaej cienzmienh hwnqbaenz aen guekak sevei cujyi yendaiva dwk roengz giekdaej maenhsaed. Aeu comzrengz bae cauhlaeb aen dijci yiengh hawciengz ginghci sevei cujyi suijbingz sang, comzrengz bae guh yiengh yinzminz minzcuj ronzdoeng goekbyai, comzrengz bae hwnqguh aen vwnzva guekak sevei cujyi, comzrengz bae hawj yinzminz gwndaenj engq ndei, comzrengz bae hwnqguh aen Cungguek gyaeundei, comzrengz bae hwnqguh aen Cungguek an’onj suijbingz engq sang, comzrengz bae hawj Dangj engq rox lingjdauj caeuq ciengzgeiz gaemgienz, laebdaeb doi gaijgwz guh baenaj. Daengz 2029 nienz mwh Cunghvaz Yinzminz Gunghozgoz laebbaenz 80 hopbi, guhbaenz gij yinvu gaijgwz ndaw aen gietdingh neix daezok haenx.

Cienzhoih daegbied gangj daengz, caiq cienzmienh gyalaeg gaijgwz aeu cungjgez caeuq yunghndei gij gingniemh dijbauj gaijgwz hailangh doxdaeuj daegbied dwg cienzmienh gyalaeg gaijgwz seizdaih moq, hengz ndei gij yenzcwz dawzmaenh seizseiz yienghyiengh aeu Dangj lingjdauj、dawzmaenh cuengq yinzminz youq vih daih’it、dawzmaenh souj goek cauhmoq、dawzmaenh aeu cidu gensez guh sienqmeh、dawzmaenh cienzmienh ciuqfap guenj guek、dawzmaenh hidungj gvanhnen daengj.

Cienzhoih doiq caiq cienzmienh gyalaeg gaijgwz guh’ok baenzroix baijbouh, daegbied gangj daengz cauhlaeb aen dijci yiengh hawciengz ginghci sevei cujyi suijbingz sang, laebcaez aen dijci gihci doinyoengx ginghci caetliengh sang bae hwngfat, cauhlaeb aen dijci gihci haeujcoengh yienghyiengh cauhmoq, laebcaez aen dijhi ceihleix hungzgvanh ginghci, laebndei aen dijci gihci hawsingz lajmbanj yungzhab hwngfat, laebndei aen dijci gihci doiq rog hailangh suijbingz sang, laebcaez aen cidu dijhi yinzminz minzcuj ronzdoeng goekbyai, laebndei aen dijhi fapceih sevei cujyi miz gij daegsaek Cungguek, gyalaeg gaijgwz aen dijci gihci vwnzva, laebcaez aen cidu dijhi baujcang caeuq gaijndei gwndaenj beksingq, gyalaeg gaijgwz aen dijci swnghdai vwnzminz, doicaenh aen dijhi caeuq gij naengzlig guekgya ancienz habngamj yienhdaih aeuyungh, laebdaeb gyalaeg gaijgwz gozfangz caeuq bingdoih, hawj Dangj engq rox lingjdauj bae guh caiq cienzmienh gyalaeg gaijgwz、doihaeuj gij yendaiva yiengh Cungguek.

Cienzhoih daezok, gij dijci yiengh hawciengz ginghci sevei cujyi suijbingz sang dwg gij baujcang youqgaenj guh gij yendaiva yiengh Cungguek. Itdingh aeu engq ndei bae yungh ndei hawciengz gihci, cauh ok aen vanzging hawciengz engqgya goengbingz、engqgya miz rengzhoengh, guhdaengz swhyenz boiqceiq yauliz ceiq sang caeuq yauqik ceiq hung, gawq “cuengq ndaej hoengh” youh “guenj ndaej maenh”, engq ndei hen hawj hawciengz mbouj luenh、fuengzre hawciengz mbouj lingz, hawj gozminz ginghci baenqcienj doengrat, gikfat gij rengznyoengx baihndaw gag baenz caeuq gij rengzhoengh cauhmoq daengx biengz. Aeu mbouj doenghngauz saekdi bae gyamaenh caeuq hwngfat gunghyoujci ginghci, mbouj doenghngauz saekdi bae nyoengxcoi、haeujcoengh、dazyinx gij ginghci mbouj dwg gunghyoujci hwngfat, baujcingq gak cungj sojyoujci ginghci ciuqfap bingzdaengj yungh swnghcanj yausu、goengbingz caeuqfaenh hawciengz doxdax、ityiengh ndaejdaengz faplwd baujhoh, coicaenh gak cungj sojyoujci ginghci doxbouj gijndei、doengzcaez hwngfat. Aeu cauhguh aen hawciengz hung daengx guek doengzcaemh, laebcaez gij cidu giekdaej hawciengz ginghci.

Cienzhoih daezok, yiengh hwngfat caetliengh sang dwg aen yinvu ceiq youqgaenj cienzmienh hwnqguh aen guekgya sevei cujyi yendaiva. Itdingh aeu yungh gij leixniemh hwngfat moq daeuj dazyinx gaijgwz, ndwn youq duenhmbaek hwngfat moq, gyalaeg gaijgwz gij gezgou mbiengj gunghawj, caezcienz yiengh banhfap youh coi youh hanh doidoengh yiengh hwngfat caetliengh sang, dajcauh hwngfat rengznyoengx moq gijak moq. Laebcaez gij dijci gihci yawj dieg dingh geiq bae hwngfat yiengh swnghcanjliz akmoq, laebcaez aen cidu coicaenh yiengh ginghci saeddaej caeuq yiengh ginghci soqcih haeujlaeg yungzhab, laebndei aen dijci gihci hwngfat hangzfugsaeh, laebcaez gij dijci gihci hwnqguh sezsih giekdaej yendaiva, laebcaez aen cidu hawj diuzlienh canjnieb diuzlienh gunghawj engq dingjndaej engq ancienz.

Cienzhoih daezok, gyauyuz、gohgi、vunzcaiz dwg doengh yiengh daj giekdaej、daj daengxbuenz dingjcengj gij yendaiva yiengh Cungguek. Itdingh aeu haeujlaeg saedhengz aen canloz gohgyau hwng guek、aen canloz vunzcaiz ak guek、aen canloz aeu cauhmoq coi guh hwngfat, gyoebgyonj doengzcaemh gaijgwz gij dijci gihci yiengh vunzcaiz gyauyuz gohgi, laebcaez gij dijci yienghmoq daengx guek comzrengz guh, hawj daengx aen dijhi cauhmoq guekgya lai ndaej cingjdaej langh rengz. Aeu gyalaeg gyonjhab gaijgwz gyauyuz, gyalaeg gaijgwz aen dijci gohgi, gyalaeg gaijgwz aen dijci gihci gungganq vunzcaiz.

Cienzhoih daezok, hungzgvanh diuzgung gohyoz、cwngfuj ceihleix mizyauq, dwg langh ok gijndei aen dijci yiengh hawciengz ginghci sevei cujyi itdingh aeu baenzneix guh. Itdingh aeu laebndei gij cidu dijhi hungzgvanh diuzgung, gyoebgyonj doihaeuj gaijgwz caizsui、ginhyungz doengh gij lingjyiz youqgaenj neix, hawj gij byaijyiengq hungzgvanh cwngcwz engqgya doxdoengz. Aeu laebndei aen dijhi guekgya canloz gveihva caeuq aen gihci dungjcouz hezdiuz cwngcwz, gyalaeg gaijgwz aen dijci caizsuiq, gyalaeg gaijgwz aen dijci ginhyungz, laebndei gij gihci saedhengz aen canloz ranghdieg doxdaengh hwngfat.

Cienzhoih daezok, singz mbanj yungzhab hwngfat, dwg gij yendaiva yiengh Cungguek itdingh aeu bae baenzneix guh. Itdingh aeu dungjcouz gij gunghyezva yienghmoq、gij cwngzcinva yienghmoq caeuq cienzmienh guhhoengh lajmbanj, hawj gviveh、hwnqguh、ceihleix singz mbanj ndaej cienzmienh yungzhab engq ndei, hawj gij yausu singz mbanj bingzdaengj doxvuenh、suengyiengq riuzdoengh, hawj singz mbanj cengca bienq iq, coihawj singz mbanj doengzcaez mwnhoengh hwngfat. Aeu laebcaez aen dijci gihci doicaenh gij cwngzcinva yienghmoq, gyamaenh caeuq laebndei aen ginghyingz cidu giekbonj lajmbanj, laebcaez aen cidu haeujcoengh guh’ak nungzyez youh hawj bouxguhnaz ndaej leih bienq fouq, gyalaeg gaijgwz aen cidu diegdeih.

Cienzhoih daezok, hailangh dwg gaiq geiqhauh sienmingz gij yendaiva yiengh Cungguek. Itdingh aeu dawzmaenh doiq rog hailangh aen gihbwnj gozcwz neix, dawzmaenh aeu hailangh coi gaijgwz, baenghgauq gijak guek raeuz miz aen hawciengz gveihmoz hungloet, youq mwh gyadaih caeuq guek wnq doxgap bae gyaak gij naengzlig hailangh, hwnqguh aen dijci moq yiengh ginghci hailangh suijbingz engq sang. Aeu yamq maenh bae gyadaih hailangh hawj cidu doiqciep gwnz gozci, gyalaeg gaijgwz aen dijci vaimou, gyalaeg gaijgwz aen dijci guenjleix canghseng’eiq guekrog douzswh caeuq doiq rog douzswh, gaijndei gij baijbouh ranghdieg hailangh, laebndei aen gihci doicaenh caetliengh sang bae caezlaeb “it rangh it loh”.

Cienzhoih daezok, guhndei yiengh yinzminz minzcuj ronzdoeng goekbyai dwg gij yendaiva yiengh Cungguek gag aeu baenzneix guh. Itdingh aeu byaijdingh diuz roen cwngci fazcanj yiengh sevei cujyi miz gij daegsaek Cungguek, hengzdingh caeuq laebndei gij cwngci cidu gaenbonj、gij cwngci cidu giekbonj、gij cwngci cidu youqgaenj guek raeuz, fungfouq gij yiengh minzcuj gak caengzgaep, dawz yinzminz danggya guhcawj caensaed、saedcaih guh haeuj daengz guekgya cwngci swnghhoz caeuq sevei swnghhoz gak aen fuengmienh bae. Aeu gyarengz laebguh aen cidu yinzminz danggya guhcawj, laebcaez gij gihci yiengh minzcuj doxyaeng, laebcaez gij cidu gihcwngz minzcuj, laebndei aen gvaengxgyaq guh gij hong daih dungjcan.

Cienzhoih daezok, fapceih dwg gij baujcang youqgaenj guhbaenz gij yendaiva yiengh Cungguek. Itdingh aeu cienzmienh gvancez saedhengz Yenfaz, henhoh gij gienzvi Yenfaz, gapdoih doicaenh gaijgwz gak aen hothoh ndaw laebfap、caepfap、dawzfap、soujfap, laebcaez aen gihci bauj hawj dangqnaj faplwd bouxboux bingzdaengj, hwngcienz gij fapceih cingsaenz sevei cujyi, henhoh sevei goengbingz cingqngeih, cienzmienh doicaenh guekgya gak yiengh hongsaeh ciuqfap daeuj guenj. Aeu gyalaeg gaijgwz aen lingjyiz laebfap, haeujlaeg doicaenh ciuqfap hingzcwng, laebcaez gij dijci gihci goengcingq caepfap dawzfap, laebndei aen gihci doihaeuj hwnqguh aen biengz fapceih, gyarengz laebguh yiengh fapceih nangqdaengz guekrog.

Cienzhoih daezok, gij yendaiva yiengh Cungguek dwg yiengh yendaiva vuzciz vwnzmingz caeuq cingsaenz vwnzmingz doxha. Itdingh aeu lai gagsaenq vwnzva bonjfaenh, hwngfat yiengh vwnzva senhcin sevei cujyi, hwngcienz yiengh vwnzva gwzming, cienzciep yiengh conzdungj vwnzva maenhndei Cunghvaz, gyavaiq hab’wngq yiengh hingzseiq moq saenqsik gisuz riengjvaiq hwngfat, gungganq guhbaenz aendoih vunzcaiz vwnzva maenhndei lailai daihdaih, gikok gij rengzhoengh cauhguh cauhmoq vwnzva daengx aen minzcuz raeuz. Aeu laebndei aen cidu rapdawz gij cwzyin gaiq hong yisiz hingzdai, gaijndei aen gihci gunghawj yiengh fugsaeh vwnzva caeuq gij canjbinj vwnzva, laebcaez aen dijhi gyoebhab ceihleix vangjloz, cauhlaeb aen dijhi doiq rog guek cienzboq engq riuz engq ndei.

Cienzhoih daezok, youq mwh hwngfat baujcang caeuq gaijndei gwndaenj beksingq dwg gij yinvu hungnaek yendaiva yiengh Cungguek. Bietdingh aeu seizseiz caenh rengz bae guh、aenq rengz bae guh, laebndei aen cidu dijhi yiengh fugsaeh vunzlai caezcaemh ceiq noix, lai roengzrengz guhndei doengh gij yienghsaeh gwndaenj beksingq ndei doh、guhgiek、baujdaej haenx, gaijgez ndei gij vwndiz nanangq leih’ik ceiq yienhsaed ceiq cigsoh beksingq ceiq gvansim de, mboujduenh muenxcuk gij siengjmuengh yinzminz gvaq saedceij gyaeundei. Aeu laebndei aen cidu faenboiq souhaeuj, caezcienz gij cwngcwz couhnieb baiz youq gonq, laebcaez aen dijhi ndawbiengz baujcang, gyalaeg gaijgwz aen dijci yihyoz veiswngh, laebcaez aen dijhi haeujcoengh caeuq fugsaeh vunzgyaeuj demlai.

Cienzhoih daezok, gij yendaiva yiengh Cungguek dwg yiengh yendaiva bouxvunz caeuq swyenz doxhuz caemhyouq. Bietdingh aeu laebndei aen cidu dijhi swnghdai vwnzmingz, gapdoih doicaenh gyangq danq、gemj uq、gya loeg、demmaj, lai bae wngqdoiq dienheiq bienqvaq, gyavaiq laebndei aen dijci gihci doeksaed yiengh leixniemh raemx saw bya heu couh dwg bya gim bya ngaenz. Aeu laebndei aen dijci giekdaej swnghdai vwnzmingz, laebcaez aen dijhi ceihleix swnghdai vanzging, laebcaez gij gihci loegsaek danqnoix bae hwngfat.

Cienzhoih daezok, guekgya ancienz dwg aen giekdaej youqgaenj hawj gij yendaiva yiengh Cungguek byaij onj bae gyae. Itdingh aeu cienzmienh hengzndei aen swhsiengj guekgya daengxbuenz ancienz, laebndei gij dijci gihci henhoh guekgya ancienz, hawj yiengh hwngfat caetliengh sang caeuq yiengh ancienz suijbingz sang ndaej doxdoeng doxcoi, caen ndaej baujcang guekgya ciengzgeiz andingh. Aeu laebcaez aen dijhi guekgya ancienz, laebndei aen gihci ceihleix goenggungh ancienz, laebcaez aen dijhi ceihleix ndawbiengz, laebndei gij gihci hawj guekgya ancienz nangqdaengz guekrog.

Cienzhoih daezok, gozfangz caeuq bingdoih yendaiva dwg aen bouhfaenh youqgaenj gapbaenz gij yendaiva yiengh Cungguek. Itdingh aeu dawzmaenh seizseiz yienghyiengh aeu Dangj lingjdauj yinzminz bingdoih, haeujlaeg saedhengz aen canloz baengh gaijgwz ak bing, vih ciuqgeiz guhbaenz aen moegbiu buekguh laebbaenz bingdoih it bak bi、daihdaej guhbaenz gozfangz caeuq bingdoih yendaiva daezhawj baujcang rengzrwd. Aeu laebndei gij dijci gihci lingjdauj guenjleix yinzminz bingdoih, gyalaeg gaijgwz aen dijhi lienzhab hoenxciengq, gyalaeg yiengh gaijgwz hamj bingdoih caeuq deihfueng.

Cienzhoih daegbied gangj daengz, aen Dangj lingjdauj dwg daj goekgaen bae baujcingq raeuz ndaej caiq cienzmienh gyalaeg gaijgwz、doihaeuj gij yendaiva yiengh Cungguek. Itdingh aeu laegdaeuq rox daengz “song aen laebdingh” ndaej gietdingh guhbaenz hongsaeh, gyaak “seiq aen roxyiuj”、dawzdingh “seiq aen gagsaenq”、guhdaengz “song aen henhoh”, seizseiz cungj gagrox aeu Dangj gag gaij bienq ndei bae dazyinx ndawbiengz coh ndei baenaj, dawzmaenh aeu yiengh cingsaenz gaijgwz caeuq ciuq biucinj yiemz bae guenj Dangj ceih Dangj, laebcaez baenzroix cidu gveihfan hawj Dangj gag gaij bienq ndei, mboujduenh coi hawj Dangj gag bienq cinghseuq、gag guh caezcienz、gag gaij bienq ndei、gag bae daezsang, baujmaenh Dangj seizseiz ndaej baenz aen goek akmaenh bae lingjdauj yiengh saehnieb sevei cujyi miz gij daegsaek Cungguek. Aeu dingjmaenh youz Dangjcunghyangh gyonjcomz lingjdauj gaiq hong caiq cienzmienh gyalaeg gaijgwz, gyalaeg gaijgwz aen cidu guhhung guh’ak aen Dangj, haeujlaeg bae guh dangjfungh lenzcwng gensez caeuq fanj nduknaeuh doucwngh, aeu yiengh cingsaenz dok ding bae guhndei gaijgwz.

Cienzhoih daegbied gangj daengz, gij yendaiva yiengh Cungguek dwg yiengh yendaiva byaij diuz roen huzbingz hwngfat. Itdingh aeu dawzdingh ciuqhengz aen cwngcwz huzbingz vaigyauh doglaeb gag guhcawj neix, coi hawj cauhlaeb aen minghyinh caezcaemh vunz lajmbwn, hengzguh gij gyaciz caezcaemh vunz lajmbwn, doeksaed aen iudaeuz lajmbwn hwngfat、aen iudaeuz lajmbwn ancienz、aen iudaeuz lajmbwn vwnzmingz, daiqdaeuz dizcang yiengh lajmbwn lai giz cungsim bingzdaengj mbouj luenh、yiengh ginghci lajmbwn doxnangq ndaej doxleih doxyungz, gyalaeg gaijgwz gij fuengfap guh hongsaeh nangqdaengz rogguek, caeuqfaenh dazyinx gaijgwz caeuq hwnqguh aen dijhi ceihleix seiqgyaiq, laemxsim henhoh gij cawjgienz、ancienz、leih’ik hwngfat guekgya.

Cienzhoih ceijok, dangqnaj caeuq baezlaeng mboengq ndeu, hag ndei hengz ndei gij cingsaenz cienzhoih dwg hangh cwngci yinvu youqgaenj daengx Dangj daengx guek ndeu. Aeu haeujlaeg hagsib roxyiuj gij cingsaenz cienzhoih, laegdaeuq roxyiuj caeuq gaemndei gij cawjdaez、yenzcwz hungnaek、banhfap hungnaek、gaenbonj baujcingq gaiq hong caiq cienzmienh gyalaeg gaijgwz. Daengx Dangj gwnzlaj cungj aeu caezsim gaprengz ca ndei gaiq hong gvancez doeksaed 《Gietdingh》, dawz gij canloz baijbouh caiq cienzmienh gyalaeg gaijgwz cienj baenz nga rengz hungloet doinyoengx gij yendaiva yiengh Cungguek.

Cienzhoih faensik le gij hingzseiq caeuq yinvu seizneix, daegbied gangj daengz aeu giendingh mbouj bienq guhbaenz aen moegbiu daengx bi ginghci sevei fazcanj. Aeu ciuq Dangjcunghyangh gij gezcwz baijbouh gvendaengz hongsaeh ginghci, doeksaed ndei gij cwngcwz hungzgvanh, lai bae gyadaih ndaw guek aeuyungh, yawj dieg dingh geiq bae hwngfat yiengh swnghcanjliz akmoq, gyavaiq gungganq gij rengz moq guh vaimou, netsaed doicaenh yiengh hwngfat loegsaek danqnoix, caensaed baujcang caeuq gaijndei gwndaenj beksingq, gyamaenh gyalai doengh yiengh haenqrengz duetgungz guh ndaej baenz de. Aeu cungjgez bingzguj “cibseiq haj” gveihva doeksaed ndaej ndei mbouj ndei, caencingq guhndei gij hong daezgonq maeuzveh “cibhaj haj” gveihva.

Cienzhoih ceijok, aeu gyoebgyonj maeuzveh hwngfat caeuq ancienz, doeksaed ndei gak hangh guhfap fuengzre vaqgej gij fungyiemj ndaw lingjyiz cungdenj baudaengz fangzdicanj、ngaenzcaiz deihfuengz cwngfuj、ginhyungz gihgou rauh iq daengj, yiemzgek doeksaed gij cwzyin ancienz swnghcanj, laebndei doengh gij banhfap gamcaek、fuengzhaed caihaih mbwnbaenz daegbied dwg raemxrongz raemxdumh, san maed fan muengx fuengzre gaemhanh gij fungyiemj ndawbiengz ancienz, caensaed henhoh ndawbiengz onjdingh. Aeu lai roengzrengz dazyinx ndei baklinx, mizyauq fuengzre vaqgej gij fungyiemj yisiz hingzdai. Aeu mizyauq wngqdoiq gij saeh yiemj saeh nyex baihrog, dazyinx ceihleix lajmbwn, gagrox bae cauxok gij vanzging baihrog ndeileih raeuz.

Cienzhoih daegbied gangj daengz, aeu giethab gaiq hong hagsib senhconz gvancez gij cingsaenz cienzhoih, ca ndei gaiq hong aeu gij lijlun cauhmoq aen Dangj daeuj cang’uk, hawj daengx Dangj engq roxyiuj Majgwzswh Cujyi caeuq engq miz bonjsaeh hwnqguh yendaiva. Aeu laebcaez aen dijhi cienzmienh yiemzhaenq guenj Dangj, caensaed bae gaijndei cozfungh, cawzseuq hingzsiz cujyi、gvanhliuz cujyi gij binghnyangq neix, laebdaeb gemjmbaeu diuzrap gihcwngz, haeujlaeg doinyoengx dangjfungh lenzcwng gensez caeuq fanj nduknaeuh doucwngh guh baenaj, netsaed guhndei gij hong liebyawj. Aeu gyamaenh mbe’gvangq gij doenghyiengh cujdiz gyauyuz guh ndaej baenz de, gyalaeg bae hagsib sonrox gij gijliz aen Dangj, henhoh aen Dangj doxgiet caezsim, mboujduenh hawj Dangj lai ak bae cauhguh、lai ndaej gietcomz、lai ak dwkhoenx.

Cienzhoih ciuq gij gvidingh dangjcangh, gietdingh dembouj Dingh Yangginz、Yiz Lizginh、Yiz Gizhungz doengh boux veijyenz deqbouj Cunghyangh Veijyenzvei neix dang boux veijyenz Cunghyangh Veijyenzvei.

Cienzhoih gietdingh, ciepsouh aen sinhcingj Cinz Gangh dungzci swzbae cizvu, mienxbae Cinz Gangh dungzci dang boux veijyenz Cunghyangh Veijyenzvei.

Cienzhoih saemjlwnh caemhcaiq doenggvaq le Cunghgung Cunghyangh Ginhsw Veijyenzvei faenh saemjcaz baugau gvendaengz Lij Sangfuz、Lij Yicauh、Sunh Ginhmingz famh gijliz famhfap youqgaenj, doekdingh aen cawqfaen haicawz gij dangjciz Lij Sangfuz、Lij Yicauh、Sunh Ginhmingz Cunghyangh Cwngcigiz youq gaxgonq guh’ok haenx.

Cienzhoih iuheuh, daengx Dangj daengx ginh daengx guek gak cuz yinzminz aeu engqgya gaenjmaed hopheux youq seiqhenz aen Dangjcunghyangh aeu Siz Ginbingz dungzci guh goek neix, yaengxsang fangeiz gaijgwz hailangh, comz sim comz rengz、haenqheiq guh baenaj, vih cienzmienh hwnqbaenz aen guekak sevei cujyi yendaiva、guhbaenz gij moegbiu buekguh aen bak bi daihngeih, aeu gij yendaiva yiengh Cungguek bae cienzmienh doicaenh Cunghvaz Minzcuz fukhwng hungmbwk cix haenqrengz buekguh!