ꐋꀨꊈ：

ꍏꑷꍔꍞꏳꇱꁠꄀꄉ，ꉢ《ꍏꇭꍏꑷꀒꁨꋍꁘꃅꐊꑷꃅꃹꅼꃅꄺꀱ、ꍏꇩꃤꐛꏀꈴꌠꄹꎆꌠꃆꂮꏤꐪ》ꄐꁱꃆꂮꐥꌠꐛꐨꌌꐊꈴꃀꈿꅉꏭꉉꀽꂿ。

ꋍ、ꐊꈴꃀꇖꃆꏤꄻꌠꉪꏡꃆꂮ

ꄈꅿꈯꄜꂿꃆꇬꆼꒆꄉꄺꀱꌠꏂꇫꌋꆀꄐꁆꌠꆹ，ꄈꄺꀱꁉꃑꏲꂠꌠꊋꐛꎖꋪꉬ。ꃄꄻꎖꋪꌋꆀꃶꐚꈉꐨꇬꉜꄉ，ꍏꑷꍔꍞꏳꏤꄻꄉꇬꄈꅿꑍꊏꈭꌕꃢꐊꈴꃀꆹꀒꁨꋍꁘꃅꐊꑷꃅꃹꅼꃅꄺꀱ、ꍏꇩꃤꐛꏀꈴꌠꄹꎆꌠꌤꃆꎥꃪꌠꆹ，ꀋꉬꀋꉆꌠꆏꄚꊁꈍꑋꁁꏯꉪꏡꌠꉬ。

ꋍꆏ，ꋋꆹꊿꉌꊈꏓꋧ、ꊋꃤꏓꋧ，ꃅꋊꀊꏀꈭꈜꀊꏀꌠꇬꄈꅿꈯꄜꂿꃆꃅꇫꑟꌠꃛꊸꈉꐨꉬ。ꃄꄻꌠꇬꋒꐯꋒꃅꊩꀽꇬ，ꄺꀱꁉꃑꌠꌋꆀꐧꋦꉪꏦꐛꏀꈴꋈꄻꌠꀊꏀꊬꌠꇬ，ꉪꇩꏤꑭꁘꀉꒉꃅꐕꄉꃅꋊꊂꂪꆹꌠꆹ，　ꈀꉘꇉꌠꆹꄺꀱꁉꃑꌠꉬ。ꄈꅿꃀꀉꒉꊰꉆꃢꌠꈿꊂꅑꅸꇁꌠ，ꄈꌋꆀꇩꏤꌤꑘꐩꋊꃅꐙꌠꊌꐨꊌꅜ、ꐩꋊꃅꐙꌠꆴꄻꌠꇫꅐꌠꆏ，ꈀꉘꇉꌠꆹꄡꇗꄺꀱꁉꃑꌠꉬ。ꃅꋊꀊꏀꈭꈜꀊꏀꌠꇬ，ꍏꇩꃤꐛꏀꈴꋈꄻꌠꐛꊂꀊꏀꌠꀹꄻꂿꄷꇬ，ꄡꇗꈀꉘꇉꌠꆹꄺꀱꁉꃑꌠꉬ。ꄈꅿ꒜ꀉꒉꑍꊏꃢꌠꐊꑷꃅꐧꋦꉪꏦꐛꏀꈴꌠꇩꏤꀉꇨꌠꋉꐛ、ꉐꈎꉈꈽꁻꌐꑍꂷꂶꌠꃅꇫꑟ，ꍏꇩꃤꐛꏀꈴꌠꌌꐊꑷꃅꍏꉸꊿꋅꇰꀋ꒜ꃅꀱꌄꆣꇁꌠꄹꎆꌠꈯꄜꂿꃆꏤꄻꄉꀐ，ꍏꇩꃤꐛꏀꈴꌠꍏꇩꐛꐨ、ꊇꅉꇖꐨ、ꏥꏦꀉꒉꀊꂾꑠꉉꈻꄉꀐ，ꍏꇩꃤꐛꏀꈴꌠꄹꎆꌠꏭꄐꇐꏤꁈꄐꁆꅐꇁ。ꄐꇐꏤꁈꄐꁆꋋꈨꃄꌬꑞꅉꑟ，ꍏꇩꃤꐛꏀꈴꌠꑴꁱꐈꌌꃶꐚꐛꐪꐛꇬ，ꊇꅉꃅꇬꆏꀒꁨꋍꁘꃅꐊꑷꃅꃹꅼꃅꄺꀱ，ꀋꆏꃅ꒔ꑞ꒔ꁆꏯꏦꉻꉺꏦꄻꐛꒆꄉ，ꍏꇩꃤꐛꏀꈴꌠꄹꎆꌠꎁꃅꄹꏦꏦꀧꌠꇲꁵꌠꇬꅑꎍ。

ꑍꆏ，ꋋꆹꍏꇩꐛꐨꐧꋦꉪꏦꄹꏦꄻꐛꒆꌋꆀꀻꎆ、ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꄹꎆꌠꃛꊸꈉꐨꉬ。ꄈꅿꃀꀉꒉꊰꉆꃢꌠꈿꊂꅑꅸꇁꌠ，ꉪꊇꆏꄹꏦꋈꄻꑟꀨꋋꏢꌌꀨꇬꄉ，ꐊꑷꃅꃹꅼꃅꄺꀱꌠꇬꈴꄉꋍꑞꋍꁁꏯꄹꏦꄻꐛꒆ，ꍏꇩꐛꐨꐧꋦꉪꏦꄹꏦꄹꇙꌊꀊꅰꃅꐛꒆꀊꅰꃅꐛꀕ，ꇩꏤꏱꄻꉻꑫꌋꆀꏱꄻꄐꊋꐛꏀꈴꑟꐨꄇꇖꀕꃅꉀꐕꄉ，ꐊꑷꃅꊼꇅꌣꈚꌠꐧꋦꋉꐛꌠꎁꃅꄹꏦꏦꀧꐨꊋꑌꌠꇲꁵꀐ。ꋍꈭꐨ，ꏸꐚꃅꉜꄉꌶꌠꆏ，ꍏꇩꐛꐨꐧꋦꉪꏦꄹꏦꄻꐛꒆꌠꆹꇘꄟꃅꐙꌠꈴꎁꏢꉬ，ꀋꎪꃅꃄꄻꀻꎆꌠꇬꐊꄉꀋꆏꃅꀻꎆꎂꀕ，ꄹꏦꐥꀐꌠꆏꀋꆏꃅꄻꐛꒆꄻꅐ，ꀊꏀꁁꏯꀊꏀꃅꃄꄻꌠꆹꄹꏦꏀꀺꌠꄹꎆ、ꄹꏦꀈꈥꌠꄻꐛꒆꄻꅐ。ꀊꏀꌠꃅꒊꃅꇁꌋꆀꂿꃆꏭꊝꇬ，ꀋꎪꃅꀒꁨꋍꁘꃅꐊꑷꃅꃹꅼꃅꄺꀱ，　ꐪꊛꄉꋍꑞꋍꁁꏯꄹꏦꉺꏦꄻꐛꒆ，ꐴꊧꋦꈬ、ꂱꎆꅑꌠꄖ、ꀋꇎꀋꂪꅉꅋꑣ、ꊋꁧꌠꄻꀉꇨꄉ，ꀋꆏꃅꉪꇩꏤꄹꏦꂱꎆꅑꐨꀊꅰꉾꃪꃅꆹꏮꌊꇩꏤꏱꄻꄐꊋꐛꌶ。

ꌕꆏ，ꋋꆹꊇꁧꀊꂥꃅꀻꎆꌠꄹꇙ、ꀊꅰꉾꃅꉪꇩꏤꐧꋦꐮꄙꐨꀋꉬꀋꉆꌠꐛꐈꌠꇬꄐꄻꌠꃛꊸꈉꐨꉬ。ꀋꃅꋋꇅꇬ，ꊇꁧꀊꂥꃅꀻꎆꌠꄹꇙꌠꂾꎍꌠꌤꃆꑓꅐꎑꌠꆹꄡꇗꀻꎆꐮꆽꀋꏣꇎꀋꋒꌠꉬ。ꅺꌡꇬ，ꃷꎏꉻꑫꄡꇗꐛꀋꒆꑴꌦ，ꃷꎏꒅꎆꌊꇎꋒꃅꀋꐛꑴꌦ，ꍔꃚꌋꆀꃷꎏꐮꃆꂮ꓂ꃪꀋꌐꑴꌦ，ꏀꀺꄐꊋꆹꊇꁧꀊꂥꃅꀻꎆꌠꇖꐨꇬꄉꀋꄐ，ꅐꑘꉻꑫꉻꄜꀉꒉꇈꀊꀋꇨ、ꐛꒆꇈꀊꀋꌃ，ꀋꉬꀋꉆꌠꈯꄜꇮꇐꊿꇱꌌꏲꌠꐛꐨꆹꊇꅉꇬꄉꄺꀱꎼꀋꇁꌦ，ꂿꑘꅉꃀꄡꇗꈫꈈꃅꀋꐛꑴꌦ，ꇓꈓꇓꉈꃄꁕꀻꎆꌠꌋꆀꊌꐨꁆꁸꌠꐮꍣꐨꄡꇗꊼꇅꀉꒉ，ꉹꁌꐥꐨꏦꀧ、ꒆꉻꋦꈭꀧꌋꃅꌠꄡꇗꀋꇎꀋꂪꅉꐥ，ꑠꀕ。ꏓꐯꇯꎼꇁꇬ，ꌤꃆꋋꈨꆹꐯꇯꐧꋦꐮꄙꐨꀋꉬꀋꉆꌠꐛꐈꌠꄛꑣꎼꇁꌠ，ꋋꆹꀻꎆꌠꇬꌤꃆꉬ，ꀋꎪꃅꀒꁨꋍꁘꃅꐊꑷꃅꃹꅼꃅꄺꀱ，ꏦꉻꉺꏦꀂꏽꈴꄉꂥꀘꌠꄹꇙꌶ。

ꇖꆏ，ꋋꆹꃨꆰꐨꋓꎭꐨꀉꒉꀊꂾꌠꏭꊝ、ꄈꌋꆀꇩꏤꌤꑘꄔꐽꎴꏷꌠꄹꇙꌠꃛꊸꈉꐨꉬ。ꍏꇩꃤꐛꏀꈴꌠꄹꎆꌠꆹꀊꏀꏃꌠꌤꑘꐘꉬ，ꀒꁨꆹꈝ꒜ꇬꋍꑞꋍꑵꐮꄙꐨꌋꆀꃨꆰꐨꋓꎭꐨꊝꇁꎂꀕ。ꈜꀕꇈꀋꃅꋋꇅꇬꋧꃅꉐꈎꇫꅐꀋꋻꌠꐛꁏꐛꐨꀉꒉꌠꐳꃅꐈꎆꇰ，ꃅꄷꄹꁆꐮꄙꌠꌋꆀꇙꈧꌠꅐꑭꀋꆏ，ꅉꆺꑭꊂꃅꐙꌠꌤꃆꁦꎆꇱ，ꉇꉻꄉꇁꌠꅥꍅꋎꍅꌠꀋꆏꃅꊐꐕ，ꉪꇩꏤꀻꎆꌠꆹꄐꇐꏤꁈꊜꋽꄮꌋꆀꃨꆰꐨꋓꎭꐨꐯꇯꐥ、ꊨꀋꄅꉪꎖꊋꌠꐊꊈꁦꎆꑠꊭꇬꃹꆹ，ꋍꑞꋍꑵ“ꈭꏂꀉꆈ”、“ꌋꇌꀉꌙ”ꌤꆿꆹꈍꄮꑌꇫꅐꇁꉆ。ꇿꋌꐥꃅꃨꆰꐨꋓꎭꐨꋋꈨꏭꊝ，ꋍꑍꋍ꒿ꃅꃛꇨꇁꌠꇩꏹꋓꅔꅉꇬꄉꄐꇐꏤꁈꑴꇙꌠꊌꅜꇬ，ꉪꊇꀒꁨꋍꁘꃅꐊꑷꃅꃹꅼꃅꄺꀱ，ꐛꒆꌠꄹꏦꌊꃨꆰꐨꄴꏮꋊꎵ、ꇿꋌꐥꃅꋓꎭꐨꊜꄻ，ꃨꆰꌠꇬꄉꊜꋽꄮꀊꏀꌠꉗꄻ、ꐛꁏꐛꐨꇬꄉꐛꊂꀊꏀꌠꀹꄻꄻꅐ。

ꑍ、ꏤꐪꄯꒉꄐꁱꈴꎁꃆꂮ

2023ꈎ11ꆪ，ꍏꑷꍔꍞꏳꐰꏤꄉ，ꄈꅿꑍꊏꈭꌕꃢꐊꈴꃀꈿꌠꁱꐘꄐꁱꊤꄻꄉ，ꉢꁳꊤꍈꄻꎻ，ꐋꀨꊆꃛꆀ、ꊵꐕ、ꄂꑩꑤꁳꃛꊤꍈꄻꄉ，ꍏꑷꍔꍞꏳꎮꊈꉼꏃꂠꌠꇂꃴꄉꁱꐘꄐꁱꌤꃅꌠꆸꄜ。12ꆪ8ꑍ，ꁱꐘꄐꁱꊤꉘꃀꃢꌠꐊꈴꃀꈿ，ꁱꐘꄐꁱꌤꃅꌠꑌꐚꃅꃄꇬ。ꃅꐎ7ꁮꆪꎖꈐꇬ，ꁱꐘꄐꁱꊤꆹꃹꅼꃅꍤꄻꎥꃪ，ꀊꐯꈭꃅꉜꐨꇕꅲ，ꌐꄝꉉꊪꌠꃅ，ꀱꇊꀱꃅꇕꄟꄺꀱ。

ꏤꐪꄯꒉꄐꁱꈴꎁꇬ，ꉪꊇꀋꉬꀋꉆꌠꆏꄚꊁꋋꈍꑋꍈꌭꈬ：ꋍꆏꄺꀱꁉꃑꊂꅑꅸꇁꌠꈜꀕꇈꃅꋊꀊꏀꋎꌠꐊꑷꃅꃹꅼꃅꄺꀱꌠꎖꋪꁌꇐꈤꌠꏓꈹꌋꆀꌫꄻ，ꍬꈴꏥꏦꏤꄻ，ꎃꊒꌠꍔꍞꃅꍜꌭꈬ。ꑍꆏꏟꈯꀕꃅꍏꇩꃤꐛꏀꈴꌠꄹꎆ、ꄈꅿꃀꀉꒉꑍꊏꃢꌠꄐꇐꏤꁈꃅꇫꑟꌠꇬꆼꒆꄉꀒꁨꋍꁘꃅꐊꑷꃅꃹꅼꃅꄺꀱꌠꏂꇫ，ꌤꃆꌌꍝꄎꌠꌭꈬ。ꌕꆏꀋꉬꀋꉆꅉꒃꉇ，ꏦꉻꉺꏦꄺꀱꌠꌌꀨꇬꄉ，ꄐꇐꏤꁈꃅꐙꌠ、ꃅꇴꄉꉻꃅꐙꌠꀉꒉꀊꂾꃅꄺꀱꌠꌌꀨꇬꄉ，ꎆꏣꏦꉻꄺꀱꈺꇙꂿꄐꌌꀨꇬꄉ，ꄺꀱꏃꂠꂿꄐꌌꄞꅐꃅꄉ。ꇖꆏꏓꂱꋍꉎꀋꐥꌠꌭꈬ，ꏓꂱꈫꆹꈲꏣ、ꁧꀦꈲꏣ、ꀊꉗꀊꎴꌠꈲꏣꇬꈴꄉꄺꀱꌠꏂꇫꌋꆀꄹꎆ。ꉬꆏꉻꑫꏓꐛꌠꄻꀉꇨ，ꊋꀥꇱꄉꄺꀱꌠꏭꉻꄜꃅꏂꇫ、ꉻꑫꃅꄐꄻꄉ，ꋍꑞꋍꁁꏯꄺꀱꌠꐮꐊꐙ、ꋮꐊꑘꅐꇁꎻ。

ꋌꃢꐊꈴ꒜ꈿꌠꁱꐘꄐꁱꌠꆹ，ꋯꁦꍔꆙ、ꏓꐯꉪꑌꌠꌌꈁꉬꈴꎁꇬꐊꈴ。2023ꈎ11ꆪ27ꑍ，ꄈꍏꑷꅇꇰꄜꃑꄉ，ꄈꅿꑍꊏꈭꌕꃢꐊꈴ꒜ꈿꌠꇖꃆꌌꃅꄷꈁꐥꌠꌤꏲꅉꈁꐥꌠꋍꑞꋍꁁꏯꌋꆀꇥꀯꉹꁌꄹꁆꏭꉜꐨꇕꅲ。ꈀꄸꉜꇬꑌ，ꄈꍏꑷꐰꏤꄉꄈꅿꑍꊏꈭꌕꃢꐊꈴꃀꈿꌠꀋꉬꀋꉆꌠꆏꀒꁨꋍꁘꃅꐊꑷꃅꃹꅼꃅꄺꀱ、ꍏꇩꃤꐛꏀꈴꄹꎆꌠꌤꃆꎥꃪꌠꆹ，ꄺꀱꌠꃅꅷꑞꅉꑟꌠꉌꊋꏟꈯꀕꌠꌋꆀꀉꇨꃅꂿꃆꆹꄜꌠꄇꇖꀕꃅꅐꇁꀐ，ꋋꆹꃅꋊꀊꏀꈭꈜꀊꏀꌠꇬꁈꁧꑞꐕ、ꈝꃀꑞꍬꌠꏭꄜꋊꀱꌠꉬ，ꍏꇩꃤꐛꏀꈴꌠꌊꐊꑷꃅꇩꏤꀉꇨꌠꋈꄻꌠꄹꎆ、ꊿꋅꀱꌄꆣꇁꌠꌤꑘꇰꀋ꒜ꌠꏭꈻꇐꀉꒉꀊꂾꇈꎴꅼꃅꐥ。ꃅꄷꈁꐥꌠꌤꏲꅉꈁꐥꌠꋍꑞꋍꁁꏯꃅꁱꐘꅇꀨ、ꇶꏦ、ꏁꁈꀋꂿꑘꌠꑠꏭꇖꐨꁌꇐꈤꌠꀉꑌꈨꄜꎼꇁ，ꏤꐪꄯꒉꄐꁱꌠꎁꃅꉜꉚꅍꀋꂿꑘꌠꇲꁵꀐ。

2024ꈎ5ꆪ7ꑍ，ꏤꐪꄯꒉꃑꀏꄈꈏꇓꈍꈐꈨꇬꄉꉜꐨꇕꅲ，ꄈꈐꐋꀨꀉꆹꌠꏭꉜꐨꇕꅲ，ꌐꄉꋯꁦꄈꀾꈁꐥꌠꍏꑷ、ꇩꏤꑭꊂꇬꎭꆃꌄꇤꊿꌋꆀꄈꀾꀋꐊꊿꂒꋦꌠꁧꎁꉜꐨꅱꄻ，ꄚꃆꂮꐥꌠꎆꏂꑘꌋꆀꌧꃀꌧꌺꉜꐨꅱꄻ。ꅇꏮꐛꐨꇬꄉꉜꇬ，ꈀꄸꉜꇬꑌ，ꏤꐪꄯꒉꆏꏟꈯꀕꃅꍏꇩꃤꐛꏀꈴꌠꄹꎆꌠꅇꀨꋋꏢꇬꆼꒆꄉꀒꁨꋍꁘꃅꐊꑷꃅꃹꅼꃅꄺꀱꌠꄐꇐꏤꁈꏁꁈꄐꄻ，ꎃꊒꌠꍔꍞꃅꍜꌭꈬ，ꊋꇤꄉꍏꇩꃤꐛꏀꈴꌠꄹꎆꇬꎥꀺꈉꌠꏦꉻꉺꏦꌤꃆꀉꒉꀊꂾꌠꒃꉇꄉꄺꀱꌠꏂꇫ，ꅇꀨꊨꄅ，ꀋꉬꀋꉆꌠꀨꅐꇁ，ꃄꁈꃶꐚꃅꉆ，ꋋꆹꃅꋊꀊꏀꈭꈜꀊꏀꌠꇬꐊꑷꃅꃹꅼꃅꄺꀱꌠꄹꇙꌊꀊꐯꐨꌋꆀꀊꅼꐨꇬꉜꄉꂵꌠꈁꉬꄖꄑ、ꈁꉬꄐꁆꌠꉬ， ꋒꐯꋒꃅꍏꇩꐛꐨꐧꋦꉪꏦꄹꏦꄻꐛꒆꌋꆀꀻꎆ、ꇩꏤꏱꄻꉻꑫꌋꆀꏱꄻꄐꊋꐛꏀꈴꌠꄹꎆꌠꐩꋊꑴꇙꐨꄜꅐꇁꀐ，ꀋꎪꃅꍏꇩꃤꐛꏀꈴꌠꎁꃅꇙꊋꀉꇨꌠꌋꆀꄹꏦꏦꀧꌠꇲꁵꎂꀕ。ꋍꈭꐨ，ꋍꑞꋍꁆꏯꄺꀱꉜꐨꌋꆀꇖꐨ1911ꏢꄜꎼꇁꀐ。ꁱꐘꄐꁱꊤꆏꎔꎗꃅꉉꐨꌋꆀꇖꐨꋋꈨꎥꃪ，ꌌꌬꉆꌠꆏꄾꌦꋩꃅꌌꌬꄉ，221ꈚꌌꄺꀱ。

ꄐꁱꌤꃅꈴꎁꇬ，ꍏꑷꍔꍞꏳꎮꊈꉼꃀ3ꃢꈿ、ꍏꑷꍔꍞꏳꃀ2ꃢꈿꄉꍤꇖ、ꄺꀱꌠꃅꇈ，ꄜꌊꋌꃢꐊꈴꃀꈿꅉꁳꍤꇖꎻꌠꏤꐪꄯꒉꐛꀐ。

ꌕ、ꏤꐪꄯꒉꀑꐱꇶꏦꌋꆀꐊꇐꀋꉬꀋꉆꌠꃆꂮ

ꏤꐪꄯꒉꆏꌐꁌꅇꌋꆀꅇꂫꉇꄉꈭꐨ，15ꈨꐥ，ꁸꌊꀉꒉꌕꑵꃅꄉ。ꇫꇬꈧꌠꆏꇬꂾꑵꌠꉬ，ꋋꆹꏓꌧꌠꉬ，ꀋꉬꀋꉆꌠꆏꀒꁨꋍꁘꃅꐊꑷꃅꃹꅼꃅꄺꀱ、ꍏꇩꃤꐛꏀꈴꌠꄹꎆꌠꈻꇐꀉꒉꀊꂾꌠꌋꆀꀑꐱꇖꐨꉉꈻ。ꑍꈨꌠꅑꊯꇖꈨꌠꆏꑍꑵꀕꌠꉬ，ꋋꆹꁸꌧꌠꉬ，ꀋꉬꀋꉆꌠꆏꎆꏣ、ꍔꍞ、ꁱꀕ、ꐧꋦ、ꒆꉻꌧꑳ、ꇩꏤꋬꂻ、ꇩꐏꌋꆀꂽꑠꁁꏯꇬꄺꀱꌠꄐꁆ。ꊯꉬꈧꌠꆏꌕꑵꀕꌠꉬ，ꀋꉬꀋꉆꌠꆏꄈꄺꀱꌠꏭꏃꂠꌠꊋꀥꇱ、ꃹꅼꃅꄈꋈꄻꄹꏦꄺꀱ、ꄈꃅꇏꐙꎴꋈꄻꌠꌋꆀꍹꈔꏭꁏꉈꈽꐨꉉ。ꐊꇐꁸꐘꆏꏤꐪꄯꒉꋋꋐꇬꃅꊱꁨꎆꃅꁱꄀꄉ，ꋍꑵꋍꑵꃅꁱꅐꇁꌠ60ꏢꄻꄉ。

ꏤꐪꄯꒉꆏ2035ꈎꀑꐱꃅꐧꋦꉪꏦꐛꏀꈴꁻꌐꃅꇫꑟꌠꇬꉜꄉ，ꀋꉬꀋꉆꌠꆏꋌꊂꉬꈎꇬꄺꀱꏡꁈꀉꒉꀊꂾꌠꄐꁆ，ꐊꇐꄺꑣꌠꀂꏽꆏꄚꊁꐋꀋꌡꐨꈍꑋꏢꐥ。

ꋍꆏ，ꎆꏣꏦꉻꄺꀱꈻꎷꌠꂿꄐꋊꇤꌠꉜꁨ。ꃹꅼꃅꎆꏣꏦꉻꄺꀱꌠꆹꄡꇗꀒꁨꋍꁘꃅꐊꑷꃅꃹꅼꃅꄺꀱꌠꀋꉬꀋꉆꅉꉬ，ꂿꃆꀋꉬꀋꉆꌠꆏꊇꁧꀊꂥꃅꀻꎆꌠꄹꇙꌠꇬꈲꐪꐥꌠꏦꉻꉺꏦꄻꐛꒆ，ꀻꎆꇙꊋꀊꏀꌠꂱꎆꅑꐨꀊꏀꌠꄺꑣ，“ꑍꑵꀋꇙꀋꑐ”ꌠꌭꈬꌋꆀꃅꇫꑟ，ꇩꏤꑭꊂꋍꃱꃅꐙꌠꃷꎏꀉꒉꌠꏓꄻ，ꃷꎏꎆꏣꅉꃀꄹꏦꄻꐛꒆ。

ꏤꐪꄯꒉꆏꍔꃚꌋꆀꃷꎏꐮꃆꂮꂥꀘꋒꌠꈯꄜꌤꃆꋋꏢꇬꆼꒆꄉ，ꑞꅉꀊꂥꌠꐧꋦꉪꏦꃷꎏꎆꏣꏦꉻꏓꄻꌠꌌꄞꅐꌠꉆꈉꇬꄉ，ꎆꏣꏦꉻꄺꀱꌠꀋꉬꀋꉆꁁꏯꌋꆀꈭꊭꀋꉬꀋꉆꅉꇬꄐꁆꌠꃅ。ꑓꏮꇩꁨꎆꏂꑘꈯꄜꄐꊋꁦꎆꇱꌠ、ꈯꄜꋓꅔꊋꃤꉀꐕꌠꇬꉜꄉ，ꄚꃆꂮꐥꌠꏲꂠꌤꏲꅉꈧꌠꄐꇐꏤꁈꋯꐊꌠꄻꀉꇨꇁꎻ，ꇩꁨꎆꏣꄐꉻꄻꃪꌋꆀꐛꉻꋊꄻꌠꄹꎆ，ꇩꁨꎆꀨꌋꆀꇩꁨꎆꏂꑘꄻꀉꇨꄻꉾꃪꄻꀉꒉꌠꄜꎼꇁ；ꑓꏮꉻꁨꏦꀋꉬꌠꎆꏣꀻꎆꌠꄹꇙꌠꇬꉜꄉ，ꉹꁌꀰꏢꌠꎆꏣꊥꎆꏦꃤꏤꄻ，ꊋꀥꇱꄉꁨꇐꌅꈌꏦꌬꀧꌋꃅ，ꏲꑘ、ꅓꑘꇇꁈꌌꄉꎆꏣꏟꃆꏈꑘꇬꈌꄀꇇꏿꌠꏢꑲꌋꆀꄺꀱꌠꄜꎼꇁ。ꊋꀥꇱꄉꀋꈐꀋꉈꃅꋓꅔꌠꍤꄻꇨꃅꏢꑲ，ꇩꏤꑭꊂꃷꎏꋍꃱꃅꌠꌋꆀꀋꈐꀋꉈꃅꋓꅔꌠꇬꋍꇈꌠꋍꑞꋍꑵꏤꐪꌋꆀꃄꄟꋊꑣꇧꎭ，ꐊꊈꃷꎏꄹꏦꌋꆀꏤꏦꄻꐛꒆ，ꑠꀕꄜꎼꇁ。ꏁꁈꋋꈨꆹꀊꅰꃅꉾꃪꃅꐧꋦꑭꊂꈏꒆꇙꊋꌋꆀꏀꀺꍄꑐꊋꃤꄖꄑꎼꇁꌠꉬ。

ꏤꐪꄯꒉꆏꎆꏣꊇꁧꀊꂥꃅꀻꎆꌠꏦꉻꉺꏦꋈꄻꐛꒆ、ꊈꏀꒃꅐꊋꃤꀻꎆꌠꊥꎆꌠꇬꄐꁆꎼꇁ。ꇮꇐꀊꂥꌠ、ꄐꐨꀊꂥꌠ、ꊇꁧꀊꂥꌠꌌꐋꀋꌡꌠꃅꄉꌠꒃꅐꊋꃤꀻꎆꌠꇬꆼꒆꄉ，ꊋꀥꇱꄉꁁꏯꀊꏀꋓꈜꀊꏀꌠꄹꏦꇲꁵ，ꃆꏂꊂꑋꅐꑘꎆꇱꉀꎆꉺꏦꄻꄉ，ꇩꏤꎕꏦꉀꐕꌠꌌꋊꃅꅐꑘꄻꃪꊐꐕꌠꄐꏁ，ꋍꑞꋍꉹꂴꅑꌠꒃꅐꐊꊈꁳꊈꏀꒃꅐꊋꃤꇬꉜꄉꏓꋧꎻꌠꊥꎆꌠꄜꎼꇁ。

ꏤꐪꄯꒉꆏꎆꏣꏱꄻꉻꑫꄻꐛꒆꌠꇬꄐꁆꎼꇁ。ꇩꏤꄐꇐꏤꁈꄐꎖꉻꑫꌋꆀꏱꁈꏓꇲꋮꄮꉺꏦꄻꐛꒆ；ꏓꇲꄉꏱꎆꇗꏸꏦꉻꄺꀱꌠꄹꎆ，ꃅꄷꑴꌅꎆꊋꁦꎆꇱ，ꃅꄷꇗꏸꇁꀦꍔꀺ，ꋭꋽꃅꃅꄷꍔꃚꌐꐘꎝꃆꊫꌐꊋꁈꄏꈍꈐꍔꐯ，ꄉꄐꃅꍏꑷꌤꌅꈌꊋꀥꇱ、ꍏꑷꏱꎆꌬꐨꍆꐪꉀꐕ；ꎆꒉꎆꇁꏲꉻꉆꈉꏤꌋꆀꏱꄻꌠꄻꐛꒆ，ꎆꇱꌠꌋꆀꎆꏓꌠꐮꋮꄮꌠꎆꀨꃷꎏꄐꊋꄻꐛꒆ，ꎆꒉꎆꇁꍞꏲꉻꑫꄻꐛꒆꌠꄜꎼꇁ。

ꏤꐪꄯꒉꆏꇓꈓꇓꉈꐮꉔꄉꀻꎆꌠꏦꉻꉺꏦꄻꐛꒆꌠꇬꄐꁆꎼꇁ。ꀊꏀꉹꌠꇓꈓꏦꎫꐛꈴꄹꎆꌠꏦꉻꉺꏦꄻꐛꒆ；ꂿꑘꁡꇤꅉꀨꀰꏢꄹꏦꄻꈫꈈꌋꆀꄻꐛꒆ；ꂿꑘꄻꀉꇨꂿꑘꁡꇤꒇꏣꁵꉹꁌꌣꈚꊋꁈꄏꄹꏦꄻꐛꒆ；ꃹꅼꃅꃄꅉꄹꏦꄺꀱꌠꄜꎼꇁ。

ꏤꐪꄯꒉꆏꑞꅉꀊꂥꃅꉇꉻꏭꁉꃑꌠꏦꉻꉺꏦꄻꐛꒆꌠꇬꄐꁆꎼꇁ。ꎍꐽꃅꄹꏦꉹꌠꁉꃑꌠꍔꒉ；ꃹꅼꃅꉇꉻꃼꇇꏦꉻꄺꀱ；ꃹꅼꃅꉇꉻꃼꇇꃅꊿꎆꇱꌠꌋꆀꉇꉻꏭꎆꇱꏲꂠꏦꉻꄺꀱ；ꃄꁕꁉꃑꄐꉻꄻꃪ；ꊇꁧꀊꂥꃅꐯꇯ“ꋍꁕꋍꈜ”ꋈꄻꌠꄹꎆꉺꏦꄻꐛꒆꌠꄜꎼꇁ。

ꑍꆏ，ꐊꑷꃅꏀꀺꄏꐓꌠꏦꉻꉺꏦꏓꄻꌠꉜꁨ。ꏤꐪꄯꒉꆏꏓꇲꄉꂘꑘꈆꑪꇮꇐꌧꊿꏦꉻꉺꏦꏓꋍꃱꃅꄺꀱꌠꄹꎆ，ꃹꅼꃅꂘꑘꏓꇱꄺꀱ、ꃹꅼꃅꈆꑪꇮꇐꏦꉻꄺꀱ、ꃹꅼꃅꌧꊿꀻꎆꏦꉻꉺꏦꄺꀱ，ꇩꏤꏀꀺꉻꑫꉻꄜꇿꋌꄐꐨꉀꐕꌠꊡꀱ。

ꂘꑘꏦꉻꄺꀱꁁꏯ，ꉹꁸꄉꌶꅉꀊꂥꊐꌠꄺꀱꌠꄹꎆ，ꈆꑪꇮꇐꀻꎆ、ꇩꏤꄐꇐꏤꁈꈉꐨꈻꌬꌠꌷꑫꄻꄉꌠꋊꄻꉺꏦꌋꆀꌧꊿꉘꉚꈁꏦꄻꄉ，ꎃꐚꄩꐂꄉꈉꊸꌠꌷꑫꌐꑘꄐꄻ；ꌶꅉꀊꂥꊐꌠꈆꑪꇮꇐꏀꀺꉺꏦꄻꐛꒆ，ꊌꐨꐈꆦꌠꇿꋌꄐꐨꉀꐕꌠꄜꎼꇁ。

ꈆꑪꇮꇐꏦꉻꄺꀱꁁꏯ，ꊋꀥꇱꄉꇩꏤꄐꇐꏤꁈꈆꑪꇮꇐꊋꃤꋈꄻ，ꇩꏤꈆꑪꎥꃪꏲꉻ、ꑟꐨꀊꂥꌠꎥꃪꉹꌠꒉꌶꅉ、ꈆꑪꇮꇐꂴꅑꌠꎆꏂꑘꉆꈉꌋꆀꄐꉻꄻꃪ，ꈆꑪꇮꇐꎖꄎꏲꂠꌠꄻꃪ，ꅉꃀꎥꃪꁁꏯ、ꐯꏍꂴꅑꁁꏯ、ꀋꉬꀋꉆꁁꏯꂴꂿꐨ、ꄐꏁꐨꐥꌠꄐꉻꄻꀉꇨ； ꎆꏂꑘꈆꑪꇮꇐꏀꀺꀨꄜꉆꈉꄻꀉꇨꃅꄉ，ꈆꑪꇮꇐꂴꅑꎆꏂꑘꉗꄻꌊꀉꇨꇁꌠꉺꏦꄻꐛꌠꄜꎼꇁ；ꈆꑪꎥꃪꉹꌠꌤꑘꌤꃅꅉꆹꎃꐚꌠꌤꑘꌤꃅꅉꏭꀋꋌꃅꋭꋽꃅꏲꂠꌠꄹꏦꃄꌬꉆ，ꎆꏂꑘꌡꃅꏲꂠꌠꎹꎥ；ꃹꅼꃅꄉꅍꈆꑪꇮꇐꊌꐨꌅꈌꏤꁵꌠꄺꀱ。

ꌧꊿꀻꎆꏦꉻꉺꏦꄺꀱꁁꏯ，ꐳꃅꇩꏤꄐꇐꏤꁈꌧꊿꊋꃤꋈꄻ，ꋍꑞꋍꉹꌧꊿꊇꁧꉀꐕ；ꌠꏀꏀꀺꌧꊿꌋꅜ、ꌊꄻ、ꂘꄻꌠꉺꏦꄻꐛꒆ，ꀊꅰꉾꃅꌠꏀꈆꑪꇮꇐꃅꊿꊌꐨꏦꀧ；ꌧꊿꊋꊡꉺꏦꄻꀉꇨ，ꀋꎪꃅꊿꌬꀨꄜꏭꌅꈌꁵ、ꌧꊿꎁꃅꄝꏯꌠꌭꈬ；ꎿꉈꌧꊿꊙꎷꌊꇁꌠꊋꁈꄏꏦꀧꉺꏦꄻꐛꒆꌠꄜꎼꇁ。

ꌕꆏ，ꐊꑷꃅꄺꀱꌠꉜꁨ。ꏤꐪꄯꒉꆏꏓꇲꄉ“ꉬꑵꋍꉻ”ꉻꄜꄐꉻꄹꎆ、ꋮꄮꃅ“ꇖꑵꐊꑷ”ꄐꇐꏤꁈꄐꉻꄹꎆꌠꇶꏦꇂꃴꄉꀒꁨꋍꁘꃅꐊꑷꃅꃹꅼꃅꄺꀱꌠꏂꇫ，ꏓꇲꄉꎆꏣꏦꉻꄺꀱꌠꌋꆀꀉꁁꋍꑞꋍꑵꁁꏯꄺꀱꌠꄐꁆ。

ꋯꁦꌋꆀꏦꏲꁆꏯꄺꀱꁁꏯꆏ，ꈁꉬꈴꎁꇬꏓꂱꋯꁦꄹꏦꉻꑫꄻꐛꒆ、ꍏꇩꐛꐨꐧꋦꉪꏦꏦꏲꉻꑫꄻꐛꒆꌠꏭꂱꑱꅉꄉꄐꁆꎼꇁ。ꏓꂱꑱꏲꃥꌋꄻꄹꏦꋈꄻꌠꊋꀥꇱ；ꋮꇖꋯꁦꉺꏦꄻꐛꒆ；ꅉꂫꊐꌠꋯꁦꄹꏦꄻꐛꒆ；ꀉꇨꃅꊋꏓꋍꃱꃅꁁꏯꌤꃅꄐꉻꄻꐛꒆꌠꄜꎼꇁ。ꊋꀥꇱꄉꀋꉬꀋꉆꁆꏯ、ꏀꄓꁆꏯ、ꉇꉻꃆꂮꐥꌠꁆꏯꏦꃤꏤꄻ；ꍞꊟꍤꄻꌤꏲꅉ、ꇬꉢꌤꏲꅉ、ꏦꍤꌤꏲꅉ、ꍤꇽꌤꏲꅉ、ꏦꌬꏲꑘꌤꏲꅉꈁꐥꌠꂱꑱꃅꎁꃅ，ꍞꊟꍤꄻꌅꈌ、ꍤꌋꌅꈌ、ꏦꍤꌅꈌ、ꍤꇽꌅꈌ、ꃄꌬꌅꈌꐮꐊꄉꃅ、ꐮꇬꏢꑲꌠꏦꉻꉺꏦꄻꐛꒆ；ꏦꏲꐧꋦꋈꄻꌠꄹꎆꌠꉺꏦꄻꐛꒆꌠꄜꎼꇁ。

ꁱꀕꏦꉻꄺꀱꁁꏯ，ꑓꏮꐥꇐꌧꑳꌋꆀꉌꊈꌧꑳꋮꄮꃅꐙꌠꐛꏀꈴꌠꄹꎆꌠꇬꉜꄉ，ꉪꇐꉪꉻ꒿ꂘꌠꅉꀕꃅꐙꌠꄹꏦꈴꌠꄹꇙ，ꌧꑳꉘꉚ、ꌧꑳꃄꄻ、ꌧꑳꀹꄻꌤꃅꉺꏦꏀꀺꄻꃪ；ꁱꀕꁧꃤꃅꌠꌋꆀꁱꀕꅐꇐꇲꁵꉺꏦꄻꃪ，ꉾꃪꌠꁱꀕꌬꇐꇁꀦꈛꎂꃅꅉꂫꊐꌠꇬꑟꌠꉺꏦꋈꄻ；ꈄꏍꏓꇱꏱꄻꉻꑫꄻꐛꒆ；ꇩꏹꄜꁊꐛꊂꏓꄻꀱꌠꄹꎆ，ꀊꅰꃅꇿꋌꐥꌠꇩꏹꄜꁊꉻꑫꏓꄻꌠꄜꎼꇁ。

ꉹꁌꐥꐨꏦꀧꌋꆀꄻꃪꌠꄹꏦꉻꑫꄻꐛꒆꁁꏯ，ꊌꐨꁷꄻꄹꏦꄻꐛꒆ，ꊌꐨꁷꄻꐥꀹꋊꍬ；ꑘꀺꌠꌌꃅꑘꊌꌠꊥꎆꏱꁈꋦꈭꄻꃪ，ꃅꑘꊌꐛꐪꀊꏀꌠꀻꎆꌠꊋꁈꄏꌋꆀꋊꍬ；ꋭꋽꃅꃅꑘꊌꌠꊿ、ꂿꑘꊿꊋꃅꌠ、ꃅꑘꊌꐛꐪꀊꏀꌠꊿꐧꋦꏦꀧꄹꏦꄻꐛꒆ，ꐊꑷꃅꃅꑘꊌꅉꇬꄉꄜꏂꀧꐊꈽꌠꑱꁯꊫꌐꏢꑲꌠꇤꇧꎭꌠꄜꎼꇁ；ꐳꃅꑳꇤꅐꑘꀻꎆꈁꏦꀊꏀꌠꏓꄻ，ꋒꐯꋒꃅꇓꈓꈁꐥꌠꍔꃚꑳꇤꅐꑘꃷꎏꋊꄻꌠꑴꌅꌅꈌꄻꇫꁳꌠꄜꎼꇁ； ꃹꅼꃅꆅꉁꁬꋌꁦꎴꆄꄻꏦꉻꄺꀱꌠꃅ，ꋬꂻꂴꄉꌠꀻꎆꄐꇐꏤꁈꃄꌬꌠꄜꎼꇁ；ꊻꂷꀻꎆꊋꁈꄏꌋꆀꁧꃤꃅꉻꑫꄻꐛꒆ，ꒆꉘꊋꁈꄏꏱꁈꉻꑫꌋꆀꊋꊡꉺꏦꄻꐛꒆ，ꃀꌠꀨꎹꌤꑘꌋꆀꃀꌠꀨꎹꅐꑘꀻꎆꌠꏱꁈꉺꏦꄻꐛꒆ，ꊨꏦꉌꃹ、ꍕꎇꉆꃅꐙꌠꏥꏦꇬꈴꄉꋭꋽꊱꁨꃅꋍꁘꋍꁘꃅꏦꏤꎞꆏꈎꄜꄯꄉꌠꄺꀱꌠꄹꎆꌠꄜꎼꇁ。

ꒆꉻꌧꑳꏦꉻꄺꀱꁁꏯ，ꒆꉻꌧꑳꅉꃀꏦꉻꄻꐛꒆ，ꒆꉻꋦꈭꏱꄻꉻꑫꄻꐛꒆ，ꀊꃴꌋꀁꂥꀻꎆꉺꏦꄻꐛꒆꌠꄜꅐꇁ；ꃄꁕꁸ、ꍣꐨꐥ、ꊒꌸꃅꏲꂠꋎꍅꌠꒆꉻꋦꈭꏲꂠꄹꏦꃄꌬ，ꅶꍯꉜꄉꒆꉻꀧꌋꃅꁵꊒꉺꏦꄻꐛꒆ，ꀊꃴꌋꀁꂥꀻꎆꌠꊋꁈꄏꌠꏱꎆꇗꏸ、ꎆꒉꎆꇁ、ꎆꇱ、ꁌꏤꏱꁈꌋꆀꎕꏦꉻꑫꃄꌬ，ꐳꃅꀊꏀꉹꌠꊋꀦꉻꑫꄐꎖꋈꄻꌠꄜꎼꇁ。

ꇖꆏ，ꀻꎆꌠꌋꆀꋬꂻꌠꏓꈴꇲꈴꌠꉜꁨ。ꇩꏤꋬꂻꌠꆹꍏꇩꃤꐛꏀꈴꌠꄔꐽꎴꏷꌠꅉ꒜ꀋꂿꑘꌠꉬ。ꏤꐪꄯꒉꆏꇩꏤꋬꂻꀧꌋꃅꌠꄻꀊꅰꃅꄞꅐꅉꇬꐕꄉ，ꇩꏤꋬꂻꉻꑫꌋꆀꄐꊋꐛꏀꈴꌠꄹꎆꌠꇬꆼꒆꄉ，ꏓꇙꇿꋌꀊꂥꌠꇩꏤꋬꂻꀧꌋꃅꉻꑫꏓꄻ，ꇩꏤꋬꂻꈆꑪꇮꇐꊋꁵꌠꄹꎆ；ꀉꒉꀊꂾꃅꋋꇅꃅꅐꌠꄉꉻꌤꆿꀞꄻꏦꀧꉻꑫꄻꐛꒆ；ꊿꄻꀑꁮꋬꂻꍞꏲꄹꏦꄻꐛ；ꇩꏤꑭꊂꋍꃱꃅꌠꊻꂷꏲꂠꄹꏦꎹꎥꄻꐛ；ꐧꋦꋬꂻꏱꄻꉻꄜꄴꏮꋎꍅꉻꑫꄻꐛꒆ，ꏦꃤꇬꈴꄉꏦꇨꃅꉹꁌꀉꇨꃅꇫꊂꉉꄜꌠꏦꐆꑽꃤꐆꌠꃅꐨꅓꀞꌠꄜꎼꇁ。ꈭꇍꋬꂻꌤꃅꋮꄮꉺꏦꄻꐛꒆ；ꏢꑲꌠꏭꁏ、ꇑꏲꌠꏭꁏ、“ꇇꎴꏱꄻ”ꌠꏭꁏꌠꉺꏦꄻꐛꒆ；ꃼꇇꐔꈔꉆꐨꄴꏮꋎꍅꉺꏦꄻꐛꒆ，ꉇꉻꃆꂮꐥꌠꏦꃤꏦꇗꉻꑫꌋꆀꏦꏲꃄꌬꉻꑫꄻꐛꒆ， ꃹꅼꃅꏦꌬꌦꃔꇩꏹꇷꃅꌠꄜꎼꇁ。ꐪꊛꄉꃹꅼꃅꇩꐏꌋꆀꂽꄺꀱꌠꇬꆼꒆꄉ，ꏓꂱꂽꏲꂠꏱꄻꏦꉻꉺꏦꄻꐛꒆ，ꃹꅼꃅꏓꐊꌉꈿꉻꑫꄺꀱ，ꃹꅼꃅꂽꃅꄷꐂꄉꄺꀱꌠꄜꎼꇁ。

ꉬꆏ，ꄈꄺꀱꌠꏭꏲꂠꌠꊋꀥꇱꌠꉜꁨ。ꄈꅿꏲꂠꌠꆹꀒꁨꋍꁘꃅꐊꑷꃅꃹꅼꃅꄺꀱ、ꍏꇩꃤꐛꏀꈴꌠꄹꎆꌠꁧꀦꄉꀧꅍꉬ。ꏤꐪꄯꒉꄜꎼꇁꇬꄈꍏꑷꀉꒉꀊꂾꃅꏤꄻꄐꁆꃄꌬꇫꑟꉺꏦꄻꐛꒆ；ꃹꅼꃅꇥꀯꊿꌤꄹꏦꄺꀱ，ꊨꄅꃅꊾꌋꊾꌬꍝꄎꎃꊒꌠꄻꄉ，ꊋꀉꒉꃅꇤꄉꍔꍞꀉꇨ、ꆸꄜꄉꃅꀬ、ꋦꄉꄺꀱ、ꊌꐨꄞꅐ、ꃅꎃꐙꎴꌠꇥꀯꌊꄻ，ꊋꇤꄉꇥꀯꃄꈌꄐꃅꃅ、ꃅꐨꀋꃅ、ꃅꀋꀬ、ꃅꀋꇮꌠꌤꃆꂥꀘ；ꍔꏲꃅꐛꉜꐨꎃꊒꌠꑌꌋꆀꃄꄻ，“ꌕꑵꏡꃏꎼꇁ”ꌠꃅꇫꑟ，ꇥꀯꄹꀖꁨꂵ、ꌤꃅꑘꀺꌠꊋꊡ；ꄈꎀꍹꍔꍞꄐꊋꌋꆀꎀꍹꄐꊋꄻꀉꇨ；ꇶꏦꉪꏦ、ꇛꌺꉪꏦꄴꏮꄹꏦꉺꏦꄻꐛꒆ，ꃅꇏꀋꎃꀋꊒꌠꌋꆀꍹꈔꌤꃆꐯꇯꍤꄻꐯꇯꏱꄻꌠꉺꏦꄻꐛꒆ，ꍹꈔꀊꏀꉹꌠꌋꆀꂁꐥꃅꐙꌠꍹꈔꌠꄴꏮꌠꏡꁈꇿꋌꐥꌠꄻꀉꑌꇁꌠꄜꎼꇁ。

ꐋꀨꊈꑴꌠꃹꅼꃅꄈꍏꑷꉌꊈꌧꐚ，ꏟꈯꀕꃅꐊꈴꃀꈿꌠꅇꀨꇬꆼꒆꄉꐮꇖꄉ，ꋈꄻꐨꐥꌠꄺꀱꉜꐨꌋꆀꇖꐨꄜꎼꇁ，ꐯꇯꄉꐊꈴꃀꋌꃢꈿꋒ、ꏤꐪꄯꒉꄺꀱꌊꉾꃪꅊꇈ。